Teatr xadimləri   Rejissorlar

İbrahimoğlu Vaqif

Vaqif İbrahimoğlu 18 oktyabr 1949-cu ildə Bakı şəhəri Mərdəkan qəsəbəsində anadan olmuşdur.

1967-ci ildə AzDMİİ-nin "dram və kino aktyorluğu" fakültəsinə daxil olmuş, 1972-ci ildə həmin institutu bitirmişdir.

1973-1976-cı illərdə Azərbaycan Dövlət Gənc Tamaşaçılar Teatrında aktyor vəzifəsində çalışmışdır.

1976-1979-cu illərdə Azərbaycan Teatr Cəmiyyətinin nəzdindəki Eksperimental teatr Studiyasında, 1979-1982-ci illərdə Tədris Teatrında Bədii rəhbər, 1982-1989-cu illərdə isə Azərbaycan Dövlət Musiqili Komediya Teatrında baş rejissor vəzifəsində fəaliyyət göstərmişdir.

Azərbaycan Milli Akademik Dram Teatrında, Türkiyənin Ankara və Bursa teatrlarında, Estoniyanın Uqala Teatrında tamaşalar hazırlamışdır.

1989-cu ildən «YUG» Teatrının Bədii rəhbəri vəzifəsində çalışmışdır (1992-ci ildə «YUG» Teatr-Studiyası dövlət statusu almışdır). 22 may 1991-ci ildə Azərbaycan Respublikasının Əməkdar incəsənət xadimi fəxri adı ilə təltif olunub. AzTXİ-nin təsis etdiyi «Qızıl Dərviş» mükafatı laureatı, AzDMİU-nun dosentidir. 2006-cı ildə Prezident mükafatına layiq görülmüşdür.

Vaqif İbrahimoğlu «YUG» Teatrında 1989-cu ildən 2011-ci il tarixə qədər 90-a yaxın tamaşaya quruluş vermişdir.

2011-ci ilin may ayında Vaqif İbrahimoğlu dünyasını dəyişmişdi.